الرابط للمنتدي الجديد http://mebarekanew.com/vb/index.php


    نوره!!!!!!!!!!

    شاطر
    avatar
    gedo771

    عدد المساهمات : 184
    تاريخ التسجيل : 11/04/2010
    العمر : 44
    الموقع : الشرقيه/الجبيل

    نوره!!!!!!!!!!

    مُساهمة من طرف gedo771 في الأربعاء مايو 12, 2010 10:39 pm

    يا شباب اليكم بعض روائع محمد الحسن سالم حميد
    بعدين حا اهريكم شوايقه
    اصلي بموت في الشوايقه


    نورة والحلم المدردح
    هي .. أقيفن .. نورة فيكن
    نورة نقاحة الجروف ..
    نورة حلابة اللبيني .. للصغيرين والضيوف
    نورة ساعة الحر يولع .. تنقلب نسمة وتطوف
    تدي للجيعان لقيمة
    وتدي للعطشان جغيمة
    والمخلي الحال مصنقر ..
    في تقاة الليل تندقر .. تدي لي باكر بسيمة
    تكسي للماشين عرايا وفوقا إنقطع هديما
    ما عرفتن نورة إنتن .. قولن إنتن شن عرفتن
    نورة بت الواطة أخيتي .. نورة اخت كل الغلابة
    نورة حاحاية الشقاوة .. نورة هداية الضهابة
    الاراضي الياما أدت .. نورة بقت من ترابا
    وماشي في الأعماق سحابا
    مشتهنها .. والله جابا
    للجنوب طبلاً يهدهد .. لي مشاعر ناس تعابة
    وللشمال طنبور يسكت .. دمعة الميتين كآبة
    ما عرفتن نورة إنتن .. قولن إنتن شن عرفتن
    نورة عايز تقرأ قالت
    فوقا حيطة الدنيا مالت
    ختت الكراس وشالت
    منجلاً صالت به جالت
    لامن إنجرحت به شالت
    للتراب فوق إيدا كالت
    ومرة يوم في الدونكي لدغت
    جاء الفقير بالليل حواها
    ويوم ملاها الهم قطايع .. جاء البصير بالنار كواها
    ونورة ما قدرت تمانع .. تقنع الناس المعاها
    ومرة شافت في رؤاها طيرة تاكل في جناها
    حيطة تنمغى وتفلع .. في قفا الزول البناها
    في جنينة سيدي سمعت .. تمرة تصقع للوراها
    الأرض لابد ترجع للتعب فوقا ورعاها
    شافت النيل موجو لاها
    الخليقة بقت إلاها
    الشمس طبقت ضحاها
    وضو من الله .. رهاب مكتف في وتيد الليل معاها
    بين حضر بلدا وخلاها
    فسرت للناس رؤاها
    وقالوا جنت ومو براها
    ونورة زادت فوق شقاها
    وصدت الأيام تخش
    تبني لي عصفورة عش
    في السواقي تشوف عزاها
    لما شوقا يسوي .. وش
    تسقي تزرع
    تسعى تصنع
    للنهار في الليل تخش
    عرفت الشقا والشقاوة إلا ما عرفت تغش
    شايلة طولة البال من الله .. ومن أراضينا الإثارة
    وماشي تكدح طول نهارا
    وترجى لما الليل يفلل .. تسرق ألمي عشان خدارا
    عشان صغارا
    ولما ترجع لي ديارا
    تنزف أحلام الفقارى
    من عويناتا الحيارى
    لي غبار الحال تقش
    فوقو للآمال ترش
    نورة تقعد صاحي تحلم .. بي بيوت بي نور ودش
    وبالمحبة تشق دروبا .. ولي قلوب الكل تخش
    نورة تحلم بي وجود
    ما مشت بينو القيود
    أفضل أفضل بي كتير .. بي وطن من غير حدود
    نورة تحلم بي عوالم
    زي رؤى الأطفال حوالم
    لا درادر .. لا عساكر .. لا مظاليم لا مظالم
    نورة تحلم .. ولما تحلم نورة ترجف
    ولما ترجف نورة تحلم ..
    ولما ريح الواقع المر .. لي عشيش أحلاما ينسف
    نورة تنزف
    ولما تنزف بالا يهتف .. يوم حا تنصف يوم حاتنصف
    وتبدأ تحلم .. ولما تحلم نورة ترجف
    ولما ترجف نورة تحلم
    صاحي تحلم.. وصاح بتحلم
    صاح بتحلم


    _________________
    كل ما اقول انساك لا بيني لا بينك
    القي الحنين جواي يسأل يقول وينك
    avatar
    gedo771

    عدد المساهمات : 184
    تاريخ التسجيل : 11/04/2010
    العمر : 44
    الموقع : الشرقيه/الجبيل

    رد: نوره!!!!!!!!!!

    مُساهمة من طرف gedo771 في الأربعاء مايو 12, 2010 10:51 pm

    يا شباب
    انا ما سياسي
    بس بحب
    الشعر


    _________________
    كل ما اقول انساك لا بيني لا بينك
    القي الحنين جواي يسأل يقول وينك
    avatar
    محمد حسن على

    عدد المساهمات : 242
    تاريخ التسجيل : 25/04/2010
    العمر : 44
    الموقع : المملكة العربية السعودية

    رد: نوره!!!!!!!!!!

    مُساهمة من طرف محمد حسن على في الأربعاء مايو 12, 2010 11:02 pm

    ما عرفتن نورة إنتن .. قولن إنتن شن عرفتن

    (يبقالن أكان عرفن ) أبداع .

      الوقت/التاريخ الآن هو السبت ديسمبر 16, 2017 3:44 am