الرابط للمنتدي الجديد http://mebarekanew.com/vb/index.php


    طارق حبريل وعوض صاحبو

    شاطر
    avatar
    gedo771

    عدد المساهمات : 184
    تاريخ التسجيل : 11/04/2010
    العمر : 43
    الموقع : الشرقيه/الجبيل

    طارق حبريل وعوض صاحبو

    مُساهمة من طرف gedo771 في الإثنين مايو 17, 2010 11:15 pm

    السلام عليكم
    يا جماعه القصه التي سوف انقلها لكم قصه في منتهي الابداع
    وبعدين هذه القصه مفروض تكون في منتدي الثقافه
    لكن نسبه لاني رايت كثير من الاعضاء والزوار يركزو علي المنتدي العام عشان كدا نزلتها في المنتدي العام
    القصه طبعا بطلهااو الراوي يدعي طارق جبريل وهو مغترب في المغرب حسب كلام ناقل القصه
    لو ما عندك زمن ما تبداها لانها قصه ابداااااااااااع
    (
    ( الحلقة الاولي
    دحين يا الحبان ونحن في الثانوي انا وصحبي عوض دا كنا شغالين طلب
    مع بناي كدي ايدو خضراْء تحلف تقول الزول دة ساقية يمين من تبدأ الاجازة ونحن مدورين
    يوم في الصحافة ومرة اركويت وساعات في الامتداد.. المهم الخرطوم دي تحلف تقول بنيناها
    انا وعوض دا... تمانية صفايح رملة وواحد اسمنت والملطم يكون جاهز... جيب الطوب يا ولد
    غربل الرملة يا ولد... الخرصانة وصلت ولا لسا... بكرة حا نعمل البيم...
    المهم يا الحبان الرزق يوم قام ساقنا للعمارات عندنا فيها شغل شهر وكان الوكت آخر الاجازة
    ونحن مقدمين للجامعة بعد ما امتحنا الشهادة..
    عوض صحبي دا شليق شلاقة عدوكم.. قوم يوم ونحن ماشين على العمارات جاب اورنيق الجامعة معاهو
    قال عايز يستاذن من المعلم عشان يكمل الاجراءات... انا الكلام حرقني خفت الارانيق دي تقوم تغتس في الاسمنت والطوب ويكون تعبنا راح شمار في مرقة...
    المهم طلعنا الطابق التالت عشان نغير ونلبس لبس الشغل... عوض صاحبي مبسوط الليلة ويغني شافلو مسمار علق فيهو هدوما وبدأ يلبس في لبس الشغل.. عندو فنيلة تحلف تقول الفطيرة البيخلوها في آخر الصاج ديك وبيسموها (القنقروشة) يمين ان بقا ما بلاها ما تتلبس... والعرق الفيها لو كبوهو في بطارية عربية نازلة تولع...اما بنطلون الشغل بالله تقول ضربوا لغم كله مقدقد تقول غربال دراب..
    انا قلت ليه ياخي ما نغير لبس الشغل دا هنا في العمارات ديل ناس هاي ويمكن يتهمونا باكلة لحوم البشر... حلف ما يغيرو لكن الحكاية يبدو عندها معنى بعدين بيظهر..
    المهم كلمنا صباحيتنا وقبل ما نمشي نفطر قلت ليه ياخي الارانيق دي شوفليها طوبة اهجرها بيها عشان ما تطير قال لي يا زول ما تخاف يلا نمشي نفطر... ومشينا الديم يا ابو ساندرا وضربنا الفول في سوق الديم وجينا منفوخين وكروشنا قدامنا زي الحنابيك تحلف لو ختو ليك سهم نشاب في صرتك وقالولك شيل نفسك وتاني ختو السهم يصل الصحافة من الديم من شدة ما زردناها فول...
    عوض على غير عادتو يغني ساكت في الطريق... المهم لامن وصلنا لقينالكم بنيتا سمحي جنس سماح واقفة منتظرانا... جملة الايمان وجيها من شدة ما ناعم ان بقى كبولم فيهو عسل نحل ينزلق منه.. بالله البت وشها اصفر ومندي تقول منقة قلب التور... وانا وعوض صحبي وقفنا مبلمين تحلف تقول ما عمرنا اتكلمنا قبل دة.. والموقف كانت فيهو مفارقات عجيبة خلاص البت بي سماحتها دي كلها وعوض وشوا مليان اسمنت وراسه مغبر عامل زي الدرابة... المهم يا الحبان البنية قامت حلت الموقف وسألتنا منو فيكم عوض؟
    انا اتشجعت وقلت ليها دا... قامت قالت ليه انت حا تدخل السنة دي كلية الصيدلة؟؟؟ قاليها ايوة..
    قامت قالت ليه: ياخي انت راجل مكافح خلاص... الكلمة دي وقعتلنا في جرح... لاننا كنا بنسمعهامن اخوان عوض الكبار لمن يجوا من الجامعة ونحن منجعصين وصتهم ويقعدوا يتكلموا عن كفاح الطلبة والديفييشن وكلاما غلاد غلاد كدي نحن مانا فاهمين منه اليكتحنا....
    .... نواصل ....


    (( الحلقة التانية ))اها يا الحبان البت بدت تسأل فينا جنس اسئلتا تقول شغالة في جهاز الامن... شي عن الوالدين وشي عن الظروف وشي عن الطموح... وعوض مبلم ومقهي تقول ماكلو أمانة... انا القصة حرقتني... ياخي نحن جايين نشتغل ولا نعمل معاينة... قمت استأذنت منها عشان نشتغل ومشينا لي اسمنتينا وطوبنا... جملة الايمان عوض من طلعنا كضم الكضمة الياها.... ونسى كلو كلو موضوع الارانيق.. انا القصة ضربتلي في راسي انت الزولة دي من وين عرفت اننا مقدمين للجامعة... قفرنا الارانيق ما لقيناهن... اتاريها طارت مع بنطلون عوض ووقعت في حوش النسوان... قلت لي عوض زي ما جبتهن تمشي تجيبن.. المهم زولكم اتشجع ومشى جابن وانا اتاوق عليه من فوق... زولكم العرق الطلع منه في جيب الارانيق دي من ما بدينا نشتغل طلب ما طلع منه عرق قدر دة... وجاني صوتو مبحوح... قال لي الزولة دي قالت انها معجبة بي كفاحنا دة... قلت ليه يا زول انسى الموضوع دا وخلينا في طوبنا دا...
    تاني يوم يا الحبيبين نلقالكم البنية منتظرانا بي شاي الصباح ومعاهو كيك.... على باليمين قايلين نفسنا دخلنا الجنة عديل... واصلو الكان لي عوض قرب يقول صدق وعده دي واحدة من الحور العين... البنية اتاريها دخلها عوض في نافوخها... ومن السواق بتاعم عرفنا انه ابوها تاجر ليه ضل وعنده 3 بنات بس وعنده مزارع وجاه... سبحان الله الهيلمانة دي كلها و3 بنات بس... كان يجي يشوف ابو عوض اي مرة قابلته في الطريق عجبته عرسها وبقى يملص في الشفع زي قزقيز التسالي... بالله بيوت الحلة كلهن مافي واحد فيهن ما ختاهو حرامي الا بيت ناس عوص... لانه من كترة العناقريب الفيهو حقت البطان الحرامي ما عندو طريقة ينزل رجلينو... انا عوض دا ان بقيت دايرو في شي بعد 11 بالليل عارف عنقريبو وين بس ارفع راسي فوق الحيطة وعيني لي عوض مدلدل راسي في شناط الليل عنقريب مرخي كدة تقول حفرة دخان واديهو حجر زولكم طوالي يطلع يقابلني...
    المهم يا الحبان ضربنا الكيك والشاي وطلعنا لي شغلنا... ومن طلعنا وعوض مقهي... قلت ليهو عجبتك.. قال لي دي منو المابتعجبو... قلت ليهو يا ولدنا ضمنت انك حا تسكن في العمارات بس عليك الله ما تنساني... ونسيبك القادم دة عندو مزارع وانا داخل بيطرة يعني ما تتغاتت... زولكم ضحك لامن طلعلو ضرس العقل...
    المهم يا الحبيبين... بقينا نجي نلقالكم شي عصير شي كيك شي منقة جاية من المزرعة لامن سوينالنا جضيمات... المشكلة بقت في انه نحن لامن نطلع ما بنقدر ننزل والقصة دي كانت محرقة عوض في فشافيشو... قمت قلت ليه عندك حل واحد بس انت بدل تشتغل معانا فوق تقوم ترفع الرملة وبي كدة تشوف الجكس وتاخد ليك حنك حنكين... زولكم ما صدق كلم المعلم ومن تاني يوم بقى يطلع في الرملة... بس زولي انا عارفو قصة الرملة دي ما بيقدر عليها ومروتو ماها قدر دة.... لانه لامن تجي الساعة 12 وزولي يتفنس وشكله وهو مفنوس وشايل الصفيحة زي علامة الاستفهام... وشعر راسو زي بوخ السليقة...
    عوض بقى يطلع في الرملة ويتشجع لامن البنية تديهو بسمة من بعيد... جملة الايمان الزول ان بقينا قلنالوا ترفع رملة الحرطوم دي كلها هنا كان رفعها... بس مرات لامن البت تبقى ماها في وتشوفو طالع بي صفيحتو يمين لسانو ماديهو زي كلب الحر... وعيونه من التعب زي عيون ام سيسي... ولامن البنية تكلمه... يا زول جضومه تتنفخ زي العندو برنبوفي (ابوعديلات عشان ناس كردفان)... وتحلف تقول الزول دا ان بقى مات وهو في الحالة دي حا يدفنوهو وهو ضاحك لا قعر اضانو..
    الايام الاولى كلها وانا اتاوق فيهو من فوق زي الزول الصابة فوقو مطرة البت تتونس معاهو وهو مبلم زي ولد الطهور ... بعد اسبوع كدة حتا لسانو اتفك... وشوف عيني بقى يقول ليها صباح الخير... عوض يقول صباح الخير.. ايوة والله... عوض الناشف داك زي عود الطلح بقى يجي ممسح وشعره مسرح.. ومريح كمان بالرغم من انه الريحة عاملة زي النفتالين... لكن اهو عوض بقى يتريح بعد ما كانت ريحتو مع العرق ترمي الصقر.. والله ان بقيت مريت بي جنبو ساكت ريحتو تخليك تدخل في غيبوبة.... يا جماعة خير زولكم اشترى ليه مراية شخصية لانه لو ختاها مع اخوانه الكتار ديك الا يوزعوها زرة زرة بيناتهم... وبقى بعد نضرب الفول في الديم يشيل باقي الزيت ويتمسح بيهو... عشان يظهر ناعم وكدة...
    المهم يا الزينين زولكم بقى يهضرب بالبنية والبنية مكسرة فيهو... واصلو كان لي عوض ما عايز الطابق اليلم دا كلو كلو ما يتم... عوض المسكين الغنماية تاكل عشاهو بفى يغني شيتا: اساسق بالدريب الجايي بي حداكا.... وشيتا انا دستوري نازل هناك في العمارات... ودي ما بعرفو جابها من وين... دحين انا شفت زولي اتشعلقلو جنس شعليقة يفكو منها الله ساكت..
    - شوف يا عوض انت راجل رفيق العمر كله القصة شكلها ما لافقة معاك
    - ياخي ليه عشان انا فقير يعني
    - ما كدة يا الحبيب بس انت لسة المشوار قدامك فيهو مليون كيلومتر
    - ياخي بقطعوا معاها
    - يا راجل البنية دي سميحة ما قلنا حاجة بس صعب تنتظرك حا يجي اي واحد مرتاح ومتمسح ويخطفها منك وانت تبقى فاتح خشمك زي العوير...
    - ياخي انت مالك عايز تكسر مقاديفي
    - هي وينة مقاديفك دي انت عندك بلتون اخوان وناس ابوك راجنك تقول لي مقاديف
    زولكم عين لي كويس وكبسني بنية وخلاني مرمي ومشى...
    ونواصل

    الحلقة التالتة ))


    المهم يا الحبان اخدت بنيتي ومشيت كمدتها في قلبي وكملت شغلي ومشيت للبيت...
    اصبحنا الصباح وكان يوم خميس وطبعا يوم الخميس مهم جدا في حياة الطُلب لانه يوم صرف القروش... والواحد دايما بيكون قافل على كيلو باسطة وكدة..
    المهم عوض جاء مبلم لا ناضمني لا ناضمتو... كل واحد فينا مشى لي شغلو...
    عوض علي زعلتو مني البنية الصباح كلو كلو ما ظهرت... زولكم عيونه حمرت وعرقوا نازل يخرخر... ووشو بقى زي ملاح الويكة البايت.. تاوقت عليه من فوق لقيتو رفع فنيلتو العجيبة ديك لي نص كرشو..
    اصلو زولي عندو كرش ومع رفع الفنيلة دة بقى عامل زي الزول البالع ليه (قُلة)... وعلي العليه قام رفع بنطلونه السجمان داك لي ركبتو... والرجلين تحلف تقول كُنش عصيدة...
    هسا البت السجمانة دي العاجبها في الزول دة شنو ما عارف..
    مشينا نفطر وزولكم حارن،،، وعوض في الاكل عندو اكل غريب خلاص وحاتكم يقع في صحن الفول دة جف جف جف جف زي الكلب لامن يكون عطشان ويشرب من صحن الطلس...
    لكن زولكم شال ليهو لقمتين وقام...
    بس ربكم ربك الخير مع رجعتنا ظهرت ام الحسان... كان اشوفلكم الراجل فرح وابتسم زي الزول العندو ام فريحانة...
    قبضنا قريشاتنا من المعلم ومشينا لي بتاع الباسطة دغري ولهطنا باسطتنا في امان الله..
    في الطريق الزول ما مبسوط وعايز يصالحني:
    - انت لسا زعلان
    - ازعل ليه انت حر انا حبيت بس انبهك
    - تنبهني لي شنو
    - لي وضعك والمشوار الطويل المنتظرك
    - ياخي ما ممكن يمشا مع بعض
    - ما ممكن يا عوض انت عارف انت عندك كم اخو واخت وناس ابوك قافلين عليك قدر شنو
    - عارف
    - لا ما عارف.... ياخي انت نسوان الحلة ينجارن عشان يحصلن بتاع اللبن قبل ما يصل بيتكم واللبن يكمل عليهن... ولا بتاع العدة النسوان كلهن يشترن
    نص دستة كبابي ونص دستة صحانة انت امك تشتري دستتين ونص احتياطي عشان البلتون العندكم دة... ياخي انت بتاع العناقريب لمن يدخل بيتكم يطلع
    منه بعد تلاتة يوم لامن نفسو ينقطع وهو ينجد في العناقريب تحلف تقول زول من البيت... بعد دة كله تقول لي عارف...
    وصلنا بيوتنا كداري من العمارات وكل واحد فينا مشى لي بيتو...
    بالله يوم الجمعة من اصبحت اشوف ليك زولي لابد جنب بتاع الدكان...
    مشيت عليه وسلمت على بتاع الدكان... شويتين اكان نسمعلك جرس تليفون الدكان:
    - بالله عوض جنبك.... ابو الزفت البنية السميحة على التليفون.. اتاريه مصنقر هنا من اصبحت
    - الو صباح الخير (سبحان الله عوض وصباح الخير اصلهم ما بيتلموا)
    وشوية انا والهادي بتاع الدكان نسمع في القرقراب والضحك تحلف تقول الولد مولود في مقاطعة سان جيمس ما في الامتداد
    - والله انا ذاتي اشتقت ليك... دة الكلام


    الحلقة الرابعة

    انا والهادي بتاع الدكان سكتنا ساكت وزولكم شغال في التليفون..
    - والله انا زاتي ما عارف ليه عملوا لينا الجمعة دي اجازة
    الزول دة اظنو الصلاة بقى ما فاضي فيها... وشوية شوية تسمع الضحك... بالله عوض الضحكة تمرق من حلقو زي قدرة الفول الهاجرنها بي حجر.. خخيي اهييييييييي اههههه..
    - الليلة شربتي شاي الصباح بدوني...
    هو دة حب دة ولا صينية فطور...
    - بس انا وحياتك لي هسا ما فطرتة وما اظني بقدر لانه شايك بتاع الصباح كان بيفتح نفسي...
    جملة الايمان الزول دة الصينية اليقعد فوقها يلحقا امات طه.. يمين يقوم آخر زول ولو جو صورو الصحانة والصينية من بعدو بالاشعة ما يعرفوا كان فوقها شنو من شدة ما مسحها مسح...
    - اها الليلة شربتي عصير المنقة ولا خلطي ليمون بس..
    اول مرة اشوف لي حب في انواع الفواكه في سوق الخضار...
    - تعرفي انا بتعجبني وجناتك شديد...
    سبحان الله عوض كلامه كله طوب وملطم واسمنت الليلة كمان بقى يعرف الوجنات..
    - لا والله ما بجاملك انا لو بجاملك معناها بغش في نفسي...
    الزول دة بعد شوية حا يقول لي ما عايز اشتغل طلبة تاني..
    - انت لو عايز تعرفي نفسك كويس انا بديك عيوني عشان تشوفي بيها نفسك..
    شن طعم عيونك وهن عملات زي عيون الصبرا كدي ما فيهن اي تعبير..
    - تعرفي يدك من شدة ما رطبة وناعمة لمن اسلم عليك شعر جسمي كله يقوم..
    شعر جسمك قايم خلقة.. الزول دة بالله تقول ابو القنفد شعره كله قايم زي الابر
    حتى شعر نخرينو طالع زي المسمار الداقنو معوووج في خشبة....
    ربكم رب الخير جاب مصطفى اخوهو الصغير يناديهو للفطور حتى زولكم قطع المكالمة..
    وقام جري للبيت... شفتو الزول النفسو مسدودة... يمين انطلق زي بيرك عربات السفراء
    للفطور..

    الحلقة الخامسة

    مشينا يوم السبت لي شغلنا وعوض السعادة ناطة من عيونه تقول عندو غدة درقية...
    يمين ونحن في الطريق ضاربين الكدر للعمارات الزول دة اي اغنية حب وجلكسات غناها...
    بس الوكرة الوكر فيه انه دا آخر اسبوع ومنه نحن نخلص الشغل هنا...
    لمن قلت ليهو كدا زولكم نطط عيونه ونفخ الهواْء من نخرينو زي الحصان بتاع السبق.. وكضم الكضمة البي وشيها... انا قلت اسد ليه نفسه عشان يخلي الشغلانة لانها ما حا تلفق... اتاريني بوظتها تاني لانه زولكم بقى مهموم ويعضعض في لسانه زي الكلب الماسكو السعر....
    فطرنا وجينا لقينالكم البنيي السميحي في الباب ومعاها اختها كمان انا سلمت فسراع وطلعت لي طوبي واسمنتيني... وخليتو براهو... الظاهر عليها اخت البنية كانت عايزة تشوف (ألان ديلون) بتاع الامتداد دة... تاوقت عليه من فوق لقيتو يقرقر ساكت مع البنيات وبعد شوية شال صفيحتو ومشى لي رملتو.. لامن طلع فوق جاء عندي..
    - انت مالك مشيت فسراع كدي
    - يا زول انت سيد الشغلانية من اولها تموت موتك
    - اختها قالت لي صاحبك دة مالو مسيخ كدة بس سلم ومشى...
    - انا راضي بي مساختي دي يا زول والله زاتو عشان عارفني مسيخ اختارلي قراية البيطرة
    - ياخي ما تكابرني انا...
    - يا زول اكابرك في شنو انت جنيت...
    - يمكن اختها تعجبك..
    - شوف يا ابو عويض انا ماني فاضيي للحب... ووجع القلب ماني قادر عليه فشان كدي لا بقدر احب هسا ولا حاجة يا زول المشوار طويل...والبنيات ديل ما بينتظرننا... هسا يجي واحدا متمسح ومليان قروش ويعرسها ويخليك فاتح خشمك ويمشي..
    - ياخي انت مالك زول متشائم كدة
    - ياخي انا عارف امكانياتي... ياخي انت بس شوف في ابو البنيات دي كويس... الراجل يلمع من النعمة.. ما حسدناهو لكن ما حا يقبلبنا نحن ناس قريعتي راحت ديل... ياخي الراجل تريان وجضومه مليانة لامن مدلدلة زي معلاق اللبن... وشوف انت جضومك مكرمشة كيفن علي السعن الناشف...
    - بي شناتي دي البنية حبتني...
    - مبروك عليك وخليك عايش في الوهم...
    كملنا اسبوعنا ورجعنا لي امتدادنا وخليت عوض ما بين بيتهم وتلفيون دكان الهادي...
    وبعد اسبوع انا سافرت مصر لي بيطرتي وهو مشى جامعة الخرطوم لي صيدلتو...
    الجوابات بيناتنا ما انقطع... وعوض كلامه كله عن بنيتو وحبهم وانه بتجي عندو لامن تشتاق ليه في كافتريا الجامعة... يعني شغال خلط صاح...
    لمن رجعت في الاجازة لقيت ليك النيران مولعة...
    .
    .
    نواصل



    رجعت من الجامعة في مصر في الاجازة مهدود وجسمي كله قطايع وكسير... والله البيطرة دي فيها جنس جري من كفاي جداد لي مراح غنم ومن زريبة بقر لي حوش حمير.. وعلي العلي الله وقعني في مجموعة كلها سحاسيح ... شي شيراز وشي شيرين... بنات مدلعات كدة جوا يقروا بيطرة ليه ما عارف... لو في سوهاج : حصل يا طارق.. لو حمار حرن: شوفو يا طارق... المهم يا الحبيبين قلت في الاجازة دي انجمة شوية عشان اقوم اشوف البناي وين ونقوم نبدأ من جديد...
    خالتنا سكينة ام عوض جات سلمت علي شديد وقالت لي: لامن ترتاح تعال لي انا عايزاك... قلت ليها ان شاء الله
    حسيت انه عوض ساط ليهو سواطة شديدة لامن امه دي تجي وتقول لي عايزاك...
    في المساء جاء عوض واتسالمنا ومشينا دكان الهادي نظبط البوش... شفت فيه شديد.. قام قال لي ما تعاين لي كدة عارف امي جات كلمتك... قلت ليه امك ما قالت لي حاجة بس سلامها وطريقة كلامها بتقول انك عملت ليك مصيبة ولا ناوي عليها...
    ياخي انا قلت ليهم يخطبوا لي وبس..
    - يخطبوا ليك وبس، انت قايل الخطوبة دي ساهلة، وبعدين ليه يعني يخطبوا ليك من هسا وانت لسة حتى ما وصلت في قرايتك للاسبرين..
    - ياخي انا قلت ليهم نمش نقرأ الفاتحة وبس
    - والفاتحة بيقروها ساكت كدة ما لازم بشيلوا معاهم حاجات وقولة خير وشكلاتة.... انت عارف البيت عندكم رزق اليوم باليوم... وانت ما عندك التكتحك ولا حا تديهم قزازة حامض الكبريتيك وكرتونة كلوريد الصوديوم
    - ياخي ما تكسر لي مقاديفي انا والله راسي ضارب وما عارف اعمل شنو
    - انت ليه عايز تخطب يعني من هسا الجديد شنو
    - شوف انا بكرة حا اشوف الجكس وبعمل معاهو مواعيد عشان تسمع منها براك
    الصباح عوض جاء البيت ودخل الصالون وفتح الدولاب وشال ليهو قميص من قمصاني ودخل فيهو ومشى وفي المساء لمن جاء قال لي بكرة نتقابل الساعة عشرة في كافتيرية الكلية قلت ليهو اوكي
    الصباح لبست القميص بتاعي ودخلت لي في جينز ومشيت ليهم
    - السلام عليكم
    - اهلا د. طارق حمد لله على السلامة
    - الله يسلمك دكتور شنو ياخي نحن يا دوب في مرحلة الارانب
    - قميص عوض حلو في عوض بس ما حلو فيك (مع ضحكة)
    - جابت ليها نبذ كمان مع انه القميص حقي بس قلت مافي داعي نشيل حال صديقنا مع انه لابس ليه قميص اصفر وبنطلون اسود عامل زي كبسولة التتراسايكلين كدة
    - انت ليه رافض موضوعنا من الأول
    - ياخي منو القاليك كدة
    - عوض دايما بيقول لي طارق قال وقال وقال
    - انا ما ضد الموضوع بس ظروف عوض بتصعب القصة كلها هسا... انت عارفة ظروفه في البيت كيف والمشوار قدامه طويل شديد ووراهو كوم لحم لانه اخوانه الكبار الحمل تقيل عليهم فهو لازم يحصل يشيل معاهم
    - انا عارفة كل حاجة وهو حكي لي كل التفاصيل
    - قاليك امه في البيت لابسة تموت تخلي
    - قالها لي وانا عايزاهو كدة من غير كريمات (ابو الزفت الزولة شكلها واقعة لي اضنينها)
    - طيب الله يوفق انا جيت اسمع ليك حسب كلام عوض وما عندي شي اقدمه ليكم سوى دعوات بالتوفيق
    - لا انت ممكن تعمل حاجات كتيرة لانه عرفت من عوض انه ابوه وامه بيحبوك شديد
    - ما اختلفنا بس موضوع زي دة صعب شديد اكلمهم فيهو بعدين انتو مستعجلين كدة ليه على الخطوبة دي
    - لانه انا عندي مشكلة في البيت واحد من اولادي عمي اتقدم لي ومافيهو اي عيب مال وجاه وكله بس انا ما عايزة اتزوجه نهائي وابوي مصر عليه لانه ود اخوهو وانا كلمت امي بحكايتي مع عوض وقالت لي خليهو يتقدم وانا بقنع ابوك لانه عوض مستقبله مضمون
    - طيب انا حا اشوف معاهم بس ما بقدر اوعدك باي حاجة لانه صعب جدا يستوعبوا الموضوع
    الغايزني عوض كان بيتو نس مع اختها وآخر قرقراب ومخليني انا مع محكمة المظالم دي... النصيحة لي الله اختها ذاتها شديدة بس مافي طريقة في ظروفنا دي الحاجات دي عشم ابليس في الجنة
    والله البنيات عزمونا غداء مدنكل ودفعوا القروش وكمان غمتوا لي عوض حق الرجعة كمان.... الله يسألني البت دي بتحب عوض دة جنس حب عمري ما شفت زيه
    ونحن راجعين في الحاقلة سألني عوض: عرفت المشكلة وين
    - عرفتها لكن حلها صعب شديد
    ونواااااااصل

    الحلقة السابعة

    تاني يوم بالعصرية دخلت بيت ناس عوض لقيت حاجة سكينة بتعوس ليها في لقيمات... وانا اموت في اللقيمات.... جريت لي بنبر وقعدت جنبها... الله ينعلك يا عوض المرة من العواسة والجري في تربية اولادها وشها سود وملامحها كلها حزينة شديد... الله بيسألني بتعوس في اللقيمات بالطشت عشان تملأ جرادلها بتاعة الطلس البيضاء ديك وتمشي تقعد جنب الدكان تبيعها وتلقط مصاريف الوليدات... شكل اللقيمات في الطشت زي قلاب الخرصانة... غلبني اقول ليها اي حاجة... ادتني صحن فيهو لقيمات وجابت لي شاي بي لبن وبقيت ابلع واحكحك في راسي... نوع خالتي سكينة دة السودان مليان بيهو وان اختلفت حكاياتهم الا انه النتيجة واحدة... كوم شفع وارادة تكسر الصخر عشان الشفع ديل يكملوا قرايتهم ويبقوا ناس كويسين.. وزي ما قال حميد ناس مجروة وتجر(تدين) عيشن كمهو وديشن هانقدر..
    - طارق يا ولدي قول الداير تقولو ما تحرك عويناتك زي لستك الفلكسواجن كدي..
    - انت انا ما حلفتك تاني ما تسفي الصعوط دة.. مقنطرة سفتك كدة زي درج القروش بتاع الدكان كدة
    - (ضحكت لامن دموعها نزلت زي الماسورة المحلوجة ومربوطة بي دبارة).. تعرف يا طارق يا ولدي انا قاعدة اريدك ليه.. عشان بكون شايلة هم الدنيا كله فوق راسي وتجي وتخليني اضحك.... نان يا ولدي انا ما اسف كيفن من الشي البيسوو فيهو ناس عوض دة... انت ما تحمد الله الما شربتلي قزازة عرقي..
    - افو انا خالتي تسكر
    - نان يا ولدي عمايل صحبك دي يقبلوها كيفن والله فضل لي السكر... واصلو ان بقى كشف علي دكتور يمين الا يرشوني جبخان حا يلقوني منتهيي..
    - طيب العمل شنو يا خالتي صاحبي حب البنية والبنية حبتو...
    - حباهو برص... انتو مشيتو تشتغلوا ولا تحبوا.. بعدين انت مالك ما حبيت؟؟
    - انا قلبي ميت ماهو قلب حب..
    - (رجعت تضحك تاني)... هسا انت فهمك شنو
    - نمشي نخطب ليهو وبعداك هو يموت موته مع اهل البت.. ياكل نارو
    - طارق يا ولييييدي نخطبلوا بي شنو؟؟ باللقيمات الانت شايفها دي ولا بي صفايح الفسيخ اللا جوة ديلك؟؟
    - ياخي البت ما قالت هي ما عايزة اكتر من الفاتحة؟؟؟
    - في ذمتك يا ولدي الكلام دة كدي بيبقى؟؟؟ يا ولدي انا لابسالي تموت تخلي في كرعيني... شبشب زي النسوان ما عندي وتيابي كلها مهرودة ومقدقدة؟؟؟
    - بنستلفلك الشبشب والتوب كمان...
    - يا وليدي ما دايرة ولدي يتعلقلوا في حبالا دايبي
    - كدي قولي بسم الله والله بيسهلها
    - يا ولدي الله عرفوهو بالعقل ما شافوا
    - انت كدي قولي خير وانا متاكد الله بيسهلها
    - صمتت للحظة وبدا الظلام يتسرب الينا... انا يا ولدي هينة الكلام عمك عبد الله ان قدرت تقنعوا عديلة عليك وعلي صاحبك..
    خليت خالتي سكينة تملا في جرادلها باللقيمات عشان تحصل تبيعها... ومشيت على الديوان لقيت عم عبد الله فاتح راديهو على اذاعة لندن وخاتي الرادي في صدرو زي كورة الشراب...
    ونوااااصل
    الحلقة الثامنة

    عم عبد الله شايفك ليك يومين ما مشيت الشغل وما سافرت
    - يا ولدي منتظر لي قطر بضاعة اسوقه لي بورتسودان ولي هسا ما ملوهو
    - احسن ترتاح شوية
    - انت ناس اذاعة لندن دي حقو يدوك وسام ياخي انا من قمت وانت تسمع ليهم
    - يت ولدي ياها تسليتنا خصوصا لمن نكون سايقين القطر مافي شي غير الاذاعة ولهيب الشمس.... صاحبك مشى الجامعة.
    - ايوة بكرة ان شاء الله بمشي عليه الداخلية ازوره
    - دحين انت فهمك شنو في الشئ البيقول فيه دة
    - انت كدي باركها والله بسهلها... بس انت قول خير
    - يا ولدي دة كلام اصلو ما بيدخل العقل.. نمشي نقول للناس ديل شنو.. نقول ليهم نحن حق الملاح عندنا في تلتلة..
    - يا عمي هم موافقين كدة وحا يدبروا امورهم وبعداك انت عداك العيب
    - يا ولدي ما تدخلونا في ضفورنا نحن ناس علي قدر حالنا وصاحبك دة من دون اولادي فاهم الحتة
    - يا حاج والله الله بيصلحها بس انت قول خير
    - ياخي الولد دة من يومه وهو صغير عامل زي لوح التلج مجننا...
    - يا حاج لوح التلج هسا عايز يعرس لو خليناهو كدة بيدوب
    - ضاحكا بشدة.. الله يرضى عليك يا ولدي تقنعوا يخلي الموضوع دة وكمان ان بقى ما خلاهو امرنا لله...
    - بس كدي انت قول خير وكله حا يتصلح..
    - ربك كريم يا ولدي
    اصبحت الصباح مشيت لي عوض في الداخلية لقيته بيفطر... شافني حنكو وقع زي الدلو لمن يرموهو في البئر..
    - أها خير إن شاء الله..
    - كدي هسا فطرني بعداك نشوف الحاصل..
    - ياخي انت غتاتك دي أصلك ما بتخليها..
    جابت ليها غتاتة كمان.. طيب يا زول موت موتك انا ماشي...
    - يا طارق روق عليك الله ياخي انا في شنو وانت في شنو
    - انت الجكس موش حا يجي هسا
    - ايوة
    - خلاص انا لمن يجي الجكس حا اقول ليك الحاصل
    - ياخي الجكس حا تجي معاها خالتها عشان تعرف الحاصل
    - خلاص لمن تجي...
    أها ونحن قاعدين في الكلية فجأة تطل علينا البت وخالتها وأختها كمان... جملة الإيمان خالتها اشد منهم كلهم... زولة منعمة ورايقة كدة... تقول رز بي لبن... انا في الأول قايلها ما متزوجة اتاريها فايتة الاربعين وعندها 3 أطفال كمان...
    - سلام يا شباب
    - عوض قام يتراشق: اهلا بالناس الحلوة... دة صحبي طارق.. ودي خالة الشباب حنان...
    (ابو الزفت يا عوض الناس ديل شكلهم حا يطيروا حنانك زاتو)...
    - اها فطرتو يا شباب
    - والله انا فطرتة بس طارق دة لسة ما فطر
    - انت عوض خلصت محاضرات ولا لسة
    - خلصتة
    (يمين زولكم كان عنده امتحان ملاحق كان قال كملت)
    - خلاص نمشي نفطر كلنا مع بعض في اراك اوتيل
    - انا دنقرت علي عوض في اضانه: ياخي شغلنا في البنا دة كله لو جمعناهو ما بفطرنا في اراك اوتيل دة اتخارج يا ولدنا انا عندي جنيهين بس حق الرجعة
    - انت قاعد تقول لي صاحبك شنو
    - لا ابدا
    - ياخي انا عازماكم الليلة وعايزة اتعرف عليك انت بالذات كويس ممكن...
    - يا ستي انا ما عندي مانع بس ليه انا بالذات يعني
    - عشان انت وقفت مع الشباب ديل وقفة سمحة وبعدين انا عايزة اعرف عملت شنو مع اهل عوض عشان نفرح بيهم
    - يا زولة انت مالك مكبرة القصة كدة انا حاولت اساعد صاحبي وبس رغم انه الموقف صعب جدا
    - انا عارفة وحاسة كدة
    ..... ومشينا اراك اوتيل....
    ونوااااااااااصل

    الحلقة التاسعة

    مشينا الاراك هوتيل..
    - اها يا شباب تفطروا شنو انا بقترح ناخد سمك فرايد...
    - شوف يا عوض قول لي الزولة دي تشوف لينا فول زيتو كتير عشان نتمسح بعد ما نكمل.. فرايد شنو
    وهي زاتها فرايد دي تطلع شنو انا السمك البعرفو القرقور وكان بالغتة البلطي... انا عايز اغمس
    - كدي روق يا طارق عليك الله وخلي جنك دة الزولة دي عازماك وعايزة تعرف ناس أبوي قالوا شنو
    - انتو بتقولوا في شنو..
    - لا مافي حاجة
    ضربنا الأسماك والسلطات...
    - يا شباب شاي ما بطال
    - يا طارق كدي تعال اقعد جنبي
    - اوكي
    - اها الحصل شنو
    - والله الناس ديل انا اقنعتهم بعد صعوبة لكن لي هسا
    هم ما مقتنعين وشايفين القصة ما بتجي يمشوا يد قدام ويد وراء
    - يعني ما حا يجوا
    - لا ما كدة بس بصراحة كدة ما مقتنعين انه يمشوا مع ولد لسة بيقرأ
    وكمان الحتة بتاعة إنه انتو تتكفلوا بي كل حاجة دي وهم يجوا يد قدام ويد وراء شوية مأزماهم
    - انت ما شرحت ليهم
    - اكيد بس هم شايفين القصة قصة كرامة... والناس ديل رغم فقرهم إلا إنه عندهم كرامة فايتة الحد
    وشايفين إنهم حا يجوكم عشان خاطر ولدهم .. يعني ما برضاهم
    - ممكن انا امشي اقابلهم
    - بيعتمد على الشئ العايزة تقوليهو ليهم
    - انا بس عايزة اشرح ليهم انه نحن النسوان بس العارفين الأمور حا تمشي كيف...
    لانه رجالنا ما عارفين انه خالات البت هم الحا يشتروا كل حاجة... الدبل وامور الخطوبة كلها... حتى لبسة عوض من عندي انا
    - والله أشوفهم وأرد عليك... بس حاولي إنك تفهمي نفسيتهم..
    يعني لو حسوا انك بتجرحيهم حا تبوظي القصة كلها...
    - هو ولد عمها دة ما حاسس إنه البت ما عايزاهو..
    - حاسس بس هو مُصر
    - ياخي الموضوع دة عجيب من أوله
    - قالوا لي إنك معترض
    - أنا ما معترض ولا حاجة ولا عندي الحق دة... بس أنا بعرف أهل عوض كويس..
    ناس طيبين وفي حالهم.. ومنتظرين عوض دة ينتهي بتين عشان يساعدهم مع أخوانه
    - كل شئ حا يتسهل..
    الشئ الحارقني وفاقع مرارتي عوض شغال يتبسم ويكب في الجلكسات مع القرمبوز
    ومرة مرة يخت يدو في خدو تقول عايزين يصوروهو في جنة الأطفال
    وأخت الجكس تراقب فينا أنا وخالتها زي رئيس العمال
    - انت ما شايفة إنه الموضوع غريب
    - غريب... بس بتنا بتحب الولد شديد وأخير لينا تعرسوا بي رضانا وقدام عينينا من تعرسوا من ورانا
    - عوض زول كويس شديد
    - انا عارفة كدة كويس... عشان كدة نحن عايزين نشتري راجل... عندك اعتراض
    - ابدا ابدا
    - انت ما عندك مشروع زواج كمان
    أها بدينا في الكلام الأعوج... كان كدي نقوم نمشي...
    - لسة بدري.... المشوار طويل
    - يعني ما عندك جكس
    يا النبي نوح... بدينا في جرجير الكلام والبحيت
    - لا على باب الله
    - يعني مافي واحدة عاجباك
    - حتى لو في حا يكون الموضوع سراب ساكت
    - ياخي إنت ليه متشائم كدة
    - ما متشائم بس تقدري تقولي عارف حدود الحاجات العندي كويس وما عايز اتشعلق في الهواء
    - حتى لو في ناس انت عاجبهم شديد
    أهاااااااااااااااااااااااااااااااااااااااا
    يا سيدي الحسن.....
    ونواااااصل
    الحلقة العاشرة

    يوم بالمساء اسمع صوت الحاج من الشارع مع العصرية بيكورك:
    - يا طارق في جماعة عايزنك
    ألقى ليك خالة البنية ومعاها واحدة تانية وعربية تقول يا ليل والله جنسها شنو ما عارف...
    والله يستر الجلكيم خلى قراية الجريدة وبقى يشوف فينا
    - سلام يا طارق
    - وعليكم السلام
    - ياخي نحن قلنا نسأل منك في الأول عشان إنت تدخلنا لي أهل عوض ودي اختي محاسن
    - ما في مشكلة انتظروني دقيقة
    دخلت لقيت خالة سكينة تعوس في اللقيمات ومقنطرة سفتها زي ترلة القندران
    - يا خالة خليك من العواسة دي نسايب عوض جوا يشوفك
    - النبي فوقك يا ولدي
    - أيوة قومي شوفيهم
    دخلت خالات البنية عند أم عوض ومشيت اقعد مع أخوانه
    لأنه الجلكيم دة برة حا يبدأ يزرزر فيني برة عشان كدة اخير يزرزنا مع العشاء
    وأصلو العشاء ياهو الفول دة مع زرزرة الجلكيم بيبقى تركين
    ......
    شوية اسمع ليك يا طارق يا طارق
    جيت جاري لقيت النسوان خلاص مارقين من جوة ويتبسمن
    وأم عوض وأبوه مودعنهم لي برة.... شكلو كدة عوض خلاص اتورط
    - أها يا جماعة فتناكم بي عافية ومن هنا اسبوعين تشرفونا وأنا قبليها بي كم يوم بجيكم براي
    أبو الزفت الكلام دخل الحوش
    - شوف يا طارق الناس ديل حا يجوا يتقدموا رسمي وانت لازم تكون معاهم
    يا النبي نوح... وأنا في شنو
    - ياخي إنت صاحب العريس ووجودك مهم جدا
    - ام عوض: هو لو ما مشى أنا ذاتي ما بمشي ياهو ولدي التاني
    - يا حاجة تاني شنو قولي ولدك العشرين
    وكلهم ضحكوا لي قعر اضنيهم والنسوان ركبن عربيتن ومشن
    وأنا مشيت لي زرزير أبوي
    ... خلاص بقينا على المشي ليهم بعد أسبوعين
    ونوااااااااصل

    الحلقة الحادي عشر ...

    أها يا الحبيبين مرت الاسبوعين وبقينا في الكلام الجد
    شفنالنا تلات عربيات وبوكسي عشان البلتون أليل عوض دة
    انا اندرعتلي في بنطلون وقميص كان عاجباتني جايبن معاي من مصر
    ومشيت من دولاب الحاج اتريحت ومشيت بيت ناس عوض
    أها الرجال جاهزين.. خيلانه واعمامو اتنين واخوانه الكبار علي النسوان
    ما جهزن لي هسا وأبوهو ينقنق في التأخير... ونحن ما عايزنه يحرِن...
    - فجأة: يا طارق... طارق تعال... اخت عوض نادتني
    - شنو يا حنان مالكم ما جهزتو لي هسا
    - ياخي امي قالت إلا تشيل معاها حُقة الصعوط
    - يا حاجة صعوط شنو كمان التشيلي معاك في العمارات
    - نان يا ولدي إن بقيت خرمت هناك أسوي شنو
    - كمان عايزة في يوم خطوبة ولدك تقنطري سفتك زي الكبريتة المفتوحة
    - الله يقلعك.. نان ان خرمت اسوي شنو
    - عضي طرف توبك
    - طيب بدل ما اعضيهو ما اختلي فيهو سفايي فرد ويحيدي
    - انت قايلاها حلاوة كرملي... امرقي انا اصلي عارفك خرفتي
    - هو الشي الهسا ماشين نسوي دة ما ياهو الخرف ذاته
    - سمح امرقي لامن نجي بوريك الخرف كيفنهو
    ... ومشينا يا الحبان.... تيت تيت تيت... لامن وصلنا العمارات
    ... اهلا مرحب شرفتو
    ... اتفضلوا اتفضلوا
    دخلنا لقينالكم الدنيا هايصي... والبيت مليان رجال غلاد غلاد
    يمين حسين الجسمي بالنسبة ليهم ناعومي كامبل
    النصايب تقول بياكلوا تِبِنْ منفخين زي شواويل الكاويق (شواويل مليانة بي ورق شجر المنقة)
    ... والنسوان سمحات ومتمرات عكس رجالن.. شوف عيني الواحدة فيهن تقول
    للقمر قوم وأنا أقعد مكانك وباين عليهن مستلمات رجالن...
    أما إن كان للقرمبوز أليلُم يمين من سماحتن
    قلب الواحد ينتِل دق دق دق دق زي مروحة الطربيزة...
    أماني صحبي ما وقعلو وقعتن سمحي خلاص...
    أنا علي العلي مشيت أعاين في الحيط البنيناهن وبقلَنا سبب في الشي الحاصل دة
    ... جات جنبي خالة البنية: إنت ما عايز تنسى إنك طُلبة؟؟
    - أنسى كيفن وهي كانت سبب الشي دة...
    - امشي اقعد انا بعدين عايزاك
    ... يا سيدي الحسن تنجدني من المرة دي
    شكلها كدي ناويالي علي نيي....
    عوض انجعص جنب ابوهو... الحقيقة شكله اتغير بس يكتل من الضحك
    لابسلو بنطلون رمادي وقميص ابيض وبابيون احمر وجكيت رمادي
    انا الكاتلني من الضحك البابيون المشنط في رقبتو دة لأنه ذكرني عيد الضحية
    لامن يختولك دهن الكرشة وفوقه اب دمام ويقولولك ودو للنسوان...
    ... اتوهطو الرجال وبدوا الكلام


    الحلقة رقم 12
    واحد من خيلان عوض قعد يفلعص في الكلام ويعوج فيهو...
    انا في سري اقوله: ياخينا اكشح كلامك فسراع خلنا النمش نشوف بوشنا.. الفلهمة العليك شنو انت جايي ايد ورا وايد قدام
    المهم الزول قعد يطول في الكلام ويعوج فيه لامن وصل حتة: يشرفنا ويسعدنا إننا نناسبكم
    يمين ابو البت بس قال: مرحب بيكم وشرفتوا... النسوان فقعن الزغاريد .... ايويييييييييي يو يو يو
    انا طوالي عرفت إنه الرجال ديل قاعدين دلاليك ساكت..
    وووب عليك يا عوض اماني ما وقعت وما سميت... انا خايف اجي القاك مزرزر زي أبين كروش ديل لا تهش لا تنش
    ... مبروك مبروك ربنا يكمل على خير
    ... شرفتونا والله بي وجودكم
    ... د. عوض في عيونا إن شاء الله
    سبحان الله هو عوض متين بقى دكتور وهو لليلي الاسبرين ما كملو
    .. المهم يا الحبان صواني الخبايز والعصاير بقن ينطاقشن وانا اسكت ابلع واشرب
    اخدنالنا صني كدي عشان الجماعة يتعارفوا وجات خالة العروس قالت الشباب لازم يلبسوا الدبل
    بس يا الحبان يجن خالات العروس وبنات خالاتها وبنات عمها مقدمات العروس والدنيا هاصت تاني
    النصيحة لي الله البنيي سمحة سماح يكتلو زول
    قعدوها هي وعوض في كراسي ماهلات كدي
    وخالة العروس طلقت البخور وجابوا الدبل والحاجات
    وعوض من شدة الفرح عيونو يتحركن زي البليي الخاتنها في كوريي
    لبسوا دبلم
    وفجأة دخلت غنايتا غليييدي قالوا اسمها حواء قندران ولا ترلا ما عارف
    الزولة دي قعدت تلعلع والشباب دة هاص وختوا عوض وخطيبتو في النص وهاك يا رقيص
    خالة البنية جات جرتني من يدي ودخلتني الدائرة واختلي قلدي مع عوض شديدي والله من قلبي
    وبدينا نسكسك وخالة العروس تلزني وسط البنات
    وانا اقول يا ربي تمرقني سالم الليلي
    وفجأة شفتلي واحدا ليه فقهة كدي زي التلكي (الخشبة البيكسروا فيها الجزارين اللحم)
    زولكم منجعصلو في كرسي واللحم عليه كتير لامن مدفق من الكرسي بس تقول عجين خميرتو زايدي نازل من الماعون
    الولد عيونه محمري وشكل وشه ينعل قفاهو
    ونحن في الهجيج دة وسط البنيات السمحات ديل
    همست في اضان خالة البنيي: انت الزول المنفخ ابو نخرة كبييري زي وحيد القرن دة منه ومالو فارز عيشتو بعيد من الناس كدي
    ياخي حرام عليك... دة ما ود عمها الكان عايزها
    اتاريهو يشرب في العصاير يبرد في جوفه وعيني ليهو قزازة الببسي يشرب فيها زي الماسورة المفتوحة في زير
    حمدتك يا مالك روحي الما حبيت
    - انت ما حبيت لكن في ناس عينها عليك
    أهااا قمنا تاني... يا سيدي الحسن تمرقني لي أهلي سالم من العيلة دي...
    واصلنا سكسكتنا وسط النسوان القاهرات ديل..
    .. حاجة سكينة جات مسكت ولدها وقلدتو وبكت بي حرقة شديدة خلاص
    والله تقول عوض مات....
    انا سبيت لي عوض ولي قلبو ولي العمارات وللفقر
    ... خالة البنية غمزت لي عشان انقذ الموقف
    جيت مسكت حاجة سكينة من يدينها وجبتها لي وسط الجكس البيرقص
    وقعدت ارقص معاها وقلتلا: انبسطي في خطوبة ولدك عشان اجيبلك سفة من أبان كروش ديل
    والله قعدت ترقص وتضحك بي دموعها وطبعا الناس كلها مستغربة انا قلتلا شنو
    خالة العروس جاتني: النبي فوقك نسيبتنا دي قلتلا شنو
    - ياخي مالك مخصماني بالنبي الشي القلتو ليها آبيتقال.. انت موش كنت عايزها تنبسط اها انا خليتا ليكم تحتو قرض
    - (ضاحكة) انت باين عليك داهية... أها مافي واحدة من الشباب ديل ملت عينك
    - انا عيني مليانة مصائب وبناتكم السمحات ديل ما بقدر عليهن... انا وليد ربراب وماني زول حب
    وشيت عوض دة ان بقيت سويتو ابوي بيقطع راسي... هو جيتي معى عوض دي عندو فيها كلام
    - بس نسوي شنو جيتو خليتو بناتنا يهضربن
    يا ود الكرسني تحلني الليلة دي من الزرزير دة
    انا كان عارف القصي حا تصل لي كدي كان شفتلي بناي جالوص واشتغلت معاهو
    - شايفة الزولة اللابسة احمر ديك... شايفها متابعاك كيف
    يا سيدي الحسن... اقولك حاجة... تعالي نرقص انا ما مني فايدي
    - يلا... بس ما بنخليك
    عوض يوزع في البسمات وغاتس في بدلتو زي قلم البيگ
    مشيت قعدتة بينه وبين العروسة
    - والله بي طريقتي دي بتكتلي ليكي زول... ليك حق تجهجهي عوض
    - بس هو الجهجهني... وعوض دة حاجة روعة
    عوض يتبسم ساكت زي الماسكين جضومو بي مشبك
    - انت الزول الهناك دة ياهو الاخد الشاكوش...
    - ايوة هو زي اخوي
    - اتاريهو يلوغد في الخبايز كدي بي حرقة....
    - انا غايتو من قبيل اعاين للباب كويس قلت كان قامت شكلي اقوم فاكي البيرك
    ناسكم الغلاد دي ما بقدر عليهم وصحبي عليه العوض ومنه العوض ان بقى هبدوهو
    - ياخي مافي زول حا يسألكم خلاص القصة اتحسمت
    - انا خايف من خالتك دي تجيبلي دقة الليلة كلما ازوق تجي تجرني وسط البنات واعمامك ديل يحمرولي
    - ضاحكة يا زول ما في زول شغال بيك
    - كدة كويس
    عوض ضحك ضحكة خبيسي كدي
    - انت والله ما قعد تشوف
    يا ود الكرسني تحصلني....
    نقوم نهجج
    ونوااااااااااصل

    الحلقة رقم (13)
    بناتن السمحات ديل شغالات رقيص... ورجالن أبين كروش ديل جابلوم شيتن مقرطس كدي باقيلي كوكتيل شغالين يلوغدوا فيه
    انا شفت ام اعوض دفرتو من يدها في الطربيزة وقلت لي عوض كدي خلني اللشوف امك دي واجيك صادي
    - انت مالك دفرتي الشي دة
    - يا ولدي ما فهمت فيهو شي
    - انا عارفك في الزيفي دي دايرالك حرف أليل قراصي ومعاهو بصلتا خدرا تمسكيها زي المايك وتقعدي تلوغدي
    - (ضاحكة) اي والله يا ولدي... الناس ديل شيتن كلو كُتُر
    - انت مالك عليهم اسكتي اكلي البتعرفي والباقي ضوقيهو بس
    - يا ولدي قلبي ماكلني علي ولدي ما بيقدر على الناس ديل... باين عليهم نسوانم قدرات ورجالن قاعدين طراطير
    - هو وكر نفسي عندهم ... بعدين ما تخافي البنيي قاعدة تريدو شديد وباقية عليه عشرة
    - أيي والله يا ولدي... باين عليها قاعدة تريدو ،سميحي صديرا زي الوزين
    - انت قايلاهو متل أليلك علي المعلاق كدي
    - ( ضاحكة) لامن دموعها جرن.... شكيتك علي الله يا ولدي والله الا امسكك ابوسك في جضومك ديل
    - يلا سمح اكلي عشان الناس ديل عينهم عليك
    ... شويي كدي الفنانة الاسمها حواء قطر ولا شنو دي بدت تلعلع تاني والدنيا فارت من جديد
    وقبل ما خالة البنية تصلني سوقت ام عوض وقعدت ارقص معاها وجن بناتم زي البلوم حاوطونا وهاك يا كشف
    وام فستان احمر المري دي جات قاصداني عديل
    قامت ام عوض قالتلي: انت يا طارق يا ولدي البنات ديل من قبيل انا شايفاهن وخالتن يحاحين فيك باقيلي دارنك لي واحدة فيهن
    دحين يا ولدي ما تغتس انت ذاتك عشان الاتنين بتقدروا عليهن
    - دايرة توكريني انا كمان ... والله جبيرين ان بقا سمعك علي يرصصك
    - (ضاحكة) أييي ابوك صعب شديد
    خالة البنية فكتني من ام عوض ومسكتني ترقص معاي
    - الليلة ما عندك طريقة تزوق لازم تحسم حاجاتك
    يا سيدي الحسن تنجدني
    ونوااااصل

    الحلقة رقم ...14...

    ونحن بنرقص مع غناء الخرابة الاسمها حواء دي قربت مني خالة العروس....
    - أها يا طارق كيف الخطوبة بالله ماها سمحي..
    - والله ما قصرتوا تب... واحسن شي خليتو الامور مغتغتة كدي
    فشان اهل عوض ديل انت باقي عارفاهم ناس عندهم عزة نفس وكدي..
    - يا زول عوض دربوا مرق وخلاص بقى ولدنا ومننا وفينا..
    دة الكلام أماني ما وقع راجل..
    - لكن لسة الدرب ماهو طويل..
    - يا زول الأيام بتمشي زي البرق
    - أيي ما قلنا شي بس لامن يشتغل ويكوِّن نفسه القصي دايرالا صبرا كتير
    - ياخي مالك جنك حسيب كدي
    - نان مو ياهو كدي ولا انتو كمان دايرين تعرسولوا..
    - يا زول هوي نحن بنعرف كيفن نسويلُن شيتُن...
    - أها إنت كيفن قصتك
    ... يا ود الكرسني.. بدينا..
    - أنا لاني عندي قصي ولاني بتاع قصص.. أنا يا دوب أشوفلي كفاي أليل جداد
    ولا مراح أليل غنم وأقعد أربرب جنبو... العرس والحب ديل ماني قادر عليهن..
    - ياخي نحن عديل كدة عايزنك لي سحر بتنا.. وهي عينها عليك وانت باين عليك ود ناس...
    ... يا الوراريق يحلني الليلي..
    - اقولك حاجة راجلك العامل زي فنطاز الجاز داك قاعد يشوف فينا
    وإن بقا اللبع قام ماني قادر عليهو... دحين خليني اللمشي ارقص مع خالتي سكينة دي
    - (ضاحكة) يا زول راجلي شباب وروحو شباب ما تقعد تزوق..
    - انتو مالكم شيتكم كله كتور كدي
    - (تضحك لامن دمعت) ياخي لا شيتنا كتور لا شيتين بس نحن بناتنا مربنهن على الصراحي
    ونحن حسينا انها مايللاك وقلنا انت صاحب عوض وهو يشكر فيك وخالتك سكينة تشكر فيك
    قلنا خلاص زيادة الخير خيرين... يا سحر تعالي جنبنا هنا..
    ... يا سيدي الحسن تنجدني..
    البنيي جات تمشي بي مهلي... والله سمحي سماحةً تحرق في المصارين وعيونها غلاد وحواجبينا علي الهلال
    وصديرها يعوم قداما زي الوزين.. وخصيرا يمين أصغر من السبلوقة.. أما إن كان لي الرجلين متمسحان زي
    مِرِق العرِش أليل الأُوّض...والكفين شكلهن ناعمات بس حلاوة قطن.. والشي التاني ماني قادر أوصفه..
    يمين ريقي نشف وقعدت أبلع فيهو تقول متغدي تركين ومتعشي فسيخ...
    جسمي بقى يرجف زي المورود(الحمى) ورجليني بقن ينطاقشن علي ضنب الضب وعيوني اتلصقن
    في نص راسي بس بقيت زي القعويي(القعونجة).. وصوف جلدي كله قام بس أبو القنفذ..
    - سلام يا دكتور...
    يمين غلبني أرد وأحناكي بقن يكركبن زي الهبابة ولساني تقل تقول هاجرنو بي عتلة..
    أهلا.. دكتور شنو ياخي نحن يا دوب في الأرانب... كيف...
    - والله تمام.. عقبالك إن شاء الله
    - وعقبالك كمان... أنا لسة بعيد
    - مافي حاجة بعيدة
    يا ربي أنا هسا أقبل وين... يمين الغنا في حِتي وانا رقصي في حِتي.. اشتر كله كله..
    - اجازتك طويلة...
    - والله زي تلاتة شهور كدة..
    - وحا تقضيها كيف..
    - والله حا اشوف البناي وبرنامجه كيف..
    - تاني حا ترجع للبنا...
    أها قمنا لي حركات الحناكيش...
    والله يا بت الناس أنا ماني عندي شيتا أسويهو غير البنا..
    - ياخي انت راجل دكتور بُنا شنو العليك..
    - ما قلنا شي علي أنا لازم اشتغل فشان أرتب حاجاتي واطلع مصاريفي وكدي..
    - عجيبة.. المهم عايزين نشوفك في الاجازة دي
    - إن شاء الله بنتقابل...
    - خالتي سكينة: هيا طارق انت بي هني وانا افتش فيك
    حمدتك يا مالك روحي... جيتي في وكتك يا خالتي.. أماني ما كنت مزرزرلي جنس زرزير..
    - بعد إذنك بس أشوف الخالة عايزة شنو
    ... يمين البنية لوّت بوزها شبرين وكان في طريقي كانت رصصت أم عوض دي
    - انت يا ابن الهرمة انا خرماني وانت اتاريك غاتس هني بين البنوت...
    وتتلوى وتترقص علي الدابي..
    - بنوت شنو وحاتك جيتي مرقتيني من خازوقا الله لا يوريك ليه..
    - الرسول آآولدي ما تغتس مع أخوك دة.. والبنيي حلاتا..
    - هسا إنت في السفي ولا في الغتسي عاملة شلاليفك زي غِتيات الكوريي كدي
    - (ضاحكة).. بري بري يا ولدي شوفلي سفي
    - ليه حق عم عبد الله يعرس فوقك انت مسوياها صعوط وهجيج
    - إي عمك مطرطش وحا يقعد يربي في البُطان لامن يموت..
    دحين شوفلي سفي وخلي كلامك المسيخ دة...
    - مسيخ شنو.. بقيتي تكشفي كمان..
    انطلقتي علي كُبرِك.. انت دحين قبُل دة أُمِك ما سِكرَت..
    - أيي (ضاحكة).. أيي يا ولدي جدك مُحُمَد كان خاتيلو قزازي ألت شري تحت الازيار
    ومعاها كم قزازيي ألت بيرة الجمل...
    جن هي وعمتي ستنور قدرها كدي وقالن يضوقن الشي دة.. وكبايي وراء كبايي
    لامن طشمن ورقدن خَل وانبطحن في الرملة..
    قامت عمتي سألتها: انت يا الزهرة نحن وين
    قامت ردت عليها: إنت نحن وين ولا نحن ذاتنا مِنِنْ (من نحن)
    واللذيذ يا ولدي عمتي كان عندها شافع ترضع فيهو قامت قلبتو بي
    صُلبو وعايزة ترضعوا وقالت لي أُمي: إنت الولد دة مالو شلاليفو بقن كبار كدي
    - (ميتة من الضحك) الله يرحمن.. كدي قوم شوفلي سفي أنا خلاص اتكهربت
    شفتلي سفي وغمتها بيها ومشيت اهجج مع عوض
    وفجأة قام أبو عوض قال: يا جماعة كتر خيركم وربنا يجمعنا في ساعة خير
    - شرفتو كتير والله
    - جات خالة العروس: يا جماعة ما بدري
    - لا والله نمشي والليلة نحن ذاتو ساهرنا
    - شرفتونا والله.. حبابكم عشرة
    ونحن طالعين علي عرباتنا جرتني خالة المرة من يدي:
    - انت وعوض ما تقعدوا
    - عوض كان داير يقعد أليقعد علي أنا أبوي بيكون هسا شايلوا
    كلاشنكوف ومنتظرني.. دحين هو إن بقا داير يقعد خليهو
    ... عوض حمر لي واعتذرلهم..
    - خلاص انت وعوض تجو تفطروا معانا يوم الجمعة الجايي
    - إن شاء الله
    بيني وبينكم اتلفتَ وشفت في البنيي... يمين قمرة في العمارات
    الشعر أسود يقول يا ليل.. والفستان الأحمر ملصقلو في جسم
    زي القمردين.. والعيون وااارمادي والتراب في خشمي أنا من العيون..
    انعل ابوك يا الامتداد بس برضو بنحبك..
    شفتها وشافتني...
    ومشينا لي بيوتنا...
    رجعنا لي بيوتنا وخيلان عوض واعمامو كل زول مشى علي بيتو...
    - عوض: اسمع اقلع هدومك وتعالي نتونس برة..
    - كويس كدي نشوف الجو كيفن لا جوة وبطلعلك..
    دخلت لقيت جبيرين منقطر في سريرو وخالف رجلينو تقول شِعب ألات كَرِقِي (عيدان الراكوبة)
    والرادي تحتو تلعلع فيهو مذيعة اسمها المدفعجي من لندن.. وانا خايف من مدافع كلامه ارمش في عيوني..
    - أها مشيتو لي خطوبة الجن


    _________________
    كل ما اقول انساك لا بيني لا بينك
    القي الحنين جواي يسأل يقول وينك

      الوقت/التاريخ الآن هو الأحد نوفمبر 19, 2017 7:22 am