الرابط للمنتدي الجديد http://mebarekanew.com/vb/index.php


    عمود مزمل /الجمعه21

    شاطر
    avatar
    gedo771

    عدد المساهمات : 184
    تاريخ التسجيل : 11/04/2010
    العمر : 43
    الموقع : الشرقيه/الجبيل

    عمود مزمل /الجمعه21

    مُساهمة من طرف gedo771 في السبت مايو 22, 2010 3:26 pm



    اليوم كان جمعة، والحمصية مجتمعة!
    * اليوم جمعة والمداعبات في يوم الإجازة مستحبة!


    * يداعبني صديقي الهلالابي أسامة جويلي باستمرار، وهو يمتلك سخرية لاذعة لا تتوافر حتى لأطول كُتاب الهلال لسانا!


    * أمس أرسل متهكماً على تنقل شارة القيادة بين لاعبي المريخ!


    * قال: مع هلال بورتسودان كابتنكم الباشا، مع حي العرب بلة، مع الترجي النفطي، مع الأمل طارق مختار، مع الخرطوم نجم الدين، (كابتنية قدّر ظروفك بس)!


    * وقال: يا ليزراب الكابتنية عندكم هاملة هملة!


    * وقال: يعني لو لعبتوا مع منتخب شندي كابتنكم يكون مزمل أبو القاسم؟


    * وقال: غاسيروكا راجي كورة مع رواندا عشان يضوق الكابتنية!


    * وقال: طبعاً ضد أم بدة الكابتن معروف!


    * وقال: وأنا أقول كليتشي ده العاجبو في الوصافة شنو؟ أتاريهو راقدلو فوق رأي!


    * يا جويلي: الراقد فوق راي ده.. كليتشي أم المعز؟


    * والكابتنية عند الحُمّصاب شئون عائلية، بين سيدا ونسيبه!


    * الاحتكار ضار يا جعفر ضرار!


    * هسة يا جويلي في داعي ناس الخرطوم يلعبونا في المحمصة؟


    * ده ما شغل مضّرة راسو عديل.. أهل النقر ديل طالبننا مغصة؟


    * عارفين ظروفنا صعبة ولعيبتنا معوقين، في داعي لزيادة المعاناة؟


    * تدخل المحمصة ملابسك تتقطع، تعطس، تتغبر، تتكسبر، تصاب في العرقوب، عيونك تحمّر، والكهربا تقطع!


    * من بداية الموسم لحدي الآن حسن بسبوسة طالب الجماعة ديل سبعة بناطلين وخمسة قمصان!


    * الحاجة الكويسة إنو أي فريق زائر يلعب في المحمصة طوالي يطلع غالب!


    * شعار الحُمّصاب داخل المسخرة: يا ضيفنا لو زرتنا لوجدتنا نحن الضيوف وأنت رب المنزل!


    * الضيف أصلو ما بطلع منهم زعلان!


    * كرم حاتمي، أول ما يجي ياكل حمصية، ويحلي بي سمسمية، وهو مارق يلقى النقاط في خشم الباب!


    * الغريبة يا محمد عبد الماجد تتغلبوا في المحمصة عادي، لا تجدعوا حجار لا تاكلوا ديك ني!


    * حماماتكم ذاتها ما بتطير، هو إنتو مدنها طريقة؟


    * نحن الكابتنية عندنا ما فيها احتكارية، نظامنا كونفدرالي!


    * ونحن ذاتنا ناس كونفدرالية ساي!


    * لا يوم قلنا عليها منافسة الضعفاء ولا وصفناها ببطولة الصغار!


    * السنة دي يا دوب عرفنا إنتو قاصدين شنو بمنافسة الضعفاء وبطولة الصغار!


    * نحن في كل كورة عندنا كابتن، في الوصيف الحال مخيف!


    * الكابتن زي حكام العرب، لا انتخابات، لا ديمقراطية، لا تنازل، توريث وبس!


    * محمد موسى بتاع فرقة تيراب حكى نكتة: قال واحد زهجان من حماتو، مرتو قالت ليهو: الحقني، أمي اتسممت، قال ليها: قطع شك عضت لسانها!


    * لسان حماة محمد موسى دي زي لسان جويلي!


    * شداد قال: الهلال لحدي 2011 ما عندو دخل!


    * دوري ما عندكم فيهو نفقة ما تحسبوا دخلو!


    * هو الصفر كمان داير ليهو صرف؟


    * البصرف والما بصرف بيجيب الصفر، بس صفر الحمصاب طعمو برا!


    * عمرو 80 سنة، لا صغر، لا قدم، لا بهت، لا اختفى!


    * أقدم صفر في إفريقيا والعالم العربي!


    * كل سنة متضخم وزايد حلاوة!


    * قالوا كامبوس طالب 4 لاعبين على مستوى عالٍ، شوفوا العجب يا ناس!


    * منين يا حسرة؟


    * كامبوس ده قايل نفسه مدرب المريخ وللا شنو يا حسن بسبوسة؟


    * ليهو حق العمدة يقول عليك (ماك نافع)!


    * مدرب شايف النادي يسجل في أمادو.. يقول عايز 4 لعيبة على مستوى عالي؟


    * الراشيد آلي أومار قال: المعز باعنا قدام السمسمية بتحريض من المريخاب!


    * يا روشا المعز ما بايع، ولدنا لعب ليكم لعب المية، قدر روشكم!


    * ونحن لعب المية بنعرفو ولعب الخمسمية بنعرفو!


    * رصيدكم كمل قبل القون التاني بشوية، ولدنا رقد ينجم، وعينك ما تشوف إلا فرج!


    * كمان دايرنو يحرس ليكم القون بدون رصيد؟


    * على سيرة الكونفدرالية يا قسم حامص: مش قلتوا دي بطولة الصغار.. حا تلعبوا فيها كيف؟


    * أذهبوا فأنتم الضعفاء!


    آخر الحقائق


    * أثار ما كتبناه أمس عن ضيق فرص التسجيل في المريخ خلال فترة الانتقالات التكميلية ردود أفعال عديدة!


    * كثيرون أيدوا والبعض طالب بالبحث عن آلية لإخلاء خانات المصابين حتى نهاية الموسم.


    * إذا انحصرت المفاضلة بين كواسي وقودوين، فالأخير افضل!


    * لديه دافع كبير!


    * من قبل صرح قائلاً: العطالة ولا الهلال!


    * والمصيبة أنه قرن القول بالعمل!


    * كوبري أم درمان عجمان يمر بطرابلس!


    * يا نفطي غيابك طال.


    * من الواضح أنه متأثر بهجوم الجماهير عليه ليلة لقاء الترجي.


    * جوّد أداءك وسيصفق لك الجمهور الذي صاح في وجهك.


    * كثيراً غنوا لك، فماذا يضيرك إذا غضبوا منك مرة؟


    * هزتني اللمسة الإنسانية التي أقدم عليها نجم الوصل الإماراتي خالد درويش وهو يزور الصغيرة أمل كريمة قطب المريخ صلاح خضر في المستشفى ويهدي لها قميص الوصل بعد أن لزمت الفراش الأبيض عقب إصابتها في حادث مروري مؤسف.


    * نفتقد هذه اللمسات الجميلة لدى لاعبينا، ونتمنى أن يحذوا حذو خالد درويش.


    * ونبتهل إلى المولى عز وجل أن يمن بشفائه على أمل.


    * أحلى مانشيت في الصحافة الرياضية للعام الحالي كتبته صحيفة وصيف البلد أمس: ما أحلاك يا هلال.. هاتريك لسادومبا والغزال.. الفرقة الهلالية تمزق شباك المهدية بثمانية نارية!


    * العضلات عندكم!


    * بيان من قبيلة النافعاب رداً على هجوم أنصار الأرباب على سعد العمدة!


    * وبيان من اتحاد الهجن يصب في نفس الاتجاه!


    * لا نستبعد استعانة الطرف الآخر باتحاد أصحاب البصات السفرية!


    * ونتوقع تدخل اتحاد مزارعي البطاطس السكرية في الصراع الهلالي ببيان ناري!


    * بناء السواتر الدفاعية وحفر الخنادق المائية في منطقة الخمسة شمال، أقصد العرضة شمال مهم!


    * والحرب أولها كلام!


    * قال كامبوس: أحلم برؤية الهلال في ملعب ماركانا!


    * طالما عندك قرحة، أبعد من الفول يا خواجة!


    * قال الرشيد ولم نقل نحن: عاد يوسف هوت بحثاً عن حقوقه لدى الهلال!


    * كشكشوا الجيوب وادفعوا المكتوب!


    * يا يوسف.. امولادي كان أشطر!


    * علمنا أن أحد الأندية الغنية عرض على هوت إكمال علاجه في لندن!


    * وبالتحديد في نيو كاسل!


    * حد جاب سيرة كليتشي؟


    * أمسكوا العجب!


    * آخر خبر: يوسف هوت ولدنا!


    _________________
    كل ما اقول انساك لا بيني لا بينك
    القي الحنين جواي يسأل يقول وينك

      الوقت/التاريخ الآن هو الأحد نوفمبر 19, 2017 7:26 am