نظافه السياله من الشوك

سلام هوي يا جنيات. جيت هنا من ختت الكباية ما لقيت لي زول، لقيت لي كلب راقد جنب الجر (الزير) نهرتو قام شخر في داير يعضيني علا الله ستر. يا خوي أظنه سعران ما سجمه. أها يا زول قمت عندي قبضة سعف داير أدقها ما لقيت المدق. باقي الغنم ديل حبالن اتقطعن وداير أكسر لي ربق للبهم دا، وكمان سلبة للبير. أها يازول دقيت القبضة وبليتها وقعدت أفتل، أها نسيتك نساك البلا. ، ، ، جاني ولدن لي ناس علي أدروب قال لي عندو حماره وكرانة في الجرف التحتاني ودايرلو جماعة عشان يمرقوها، قلت لي كدي كورك لي أبو حسن والولاد ديل، أها مشينا على الحمارة جا فوقنا ولدن لي ناس هميناي قال الجماعة ماشين عليكن جاي. يازول ربك رب الخير يجيب فوقنا جنون رباطاب راكبين لهن بوكسي ماشين أتبرة وضهبانين، أهنا يازول مرقنا الحمارة وحلفنا عليهن يجو علي الكرقة وقلنالن الفطور مارق، جينا على الكرقة لقيت القبضة يبست قلت للولد ناولني موية من الجر داك قام لقا الجرارة كلهن فاضيات. دحين دي الختوة كيفنها؟!! ختوتن يعدلك الله. قلت ياولد في الفرصة دي أقوم أبرم حبالي الجاهزات، عشان من دوب ما فطرنا وشربنا الجبنة يقعن وأقول للجنون ديل أكسروا معاي حبل حبلين نسويلنا سلبة للبير عشان الدلو وقع من الولد في البير وقدر ما فتشنا لي شنكل ما لقينا. أها جيت على البرامة لقيت حبالها مقطعات، شوف جنس الشغلة دي كيفنها؟؟؟؟!!!